Prevenshon di malesa di nir
Bo nir ta den bo man
Prevenshon di malesa di nir por wòrdu realisá na algun manera. Aki ta sigui e maneranan di mas importante pa prevení malesa di nir.
Un dieta ku tiki salu
Espesialmente pa personanan ku tin preshon haltu i/òf diabetes, un estilo di bida salú ta hopi importante. Un estilo di bida salú ta konsistí di un dieta balansa, sufisiente moveshon di kurpa, prevenshon di stress, stòp ku humamentu i baha uso eksesivo di alkohòl. Bo kièr sa mas di estado di bo salu? Tuma e chek di salu riba:
https://www.persoonlijkegezondheidscheck.nl/
Un dieta ku tiki salu
Den nos kultura kulinario salu i vèt ta ingredientenan ku nos no ta skapa di dje. Sin embargo uso eksesivo di salu i uso di vètnan “robes” ta e malechornan di mas grandi den preshon haltu i keho riba tereno di malesa di kurason i bena: nèt e dos kousa nan di mas grandi di fayo di nir.
Estudio a mustra ku un hende mester di maksimalmente 6 gram di salu diariamente. Na Kòrsou e toma promedio di salu ta hopi mas haltu ku e 6 gram aki.
Vèt saturá ta bini den hopi produkto di orígen animal, manera karni vèt, produktonan laktante (volle melk) i keshi vèt. Tambe tin hopi vèt saturá den bolo, buskuchi i snek. Vèt saturá ta oumentá e kolesteròl LDL den sanger, loke no ta bon pa bena. Ora bo klik riba e siguiente link bo por laga tèst e kantidat di salu ku bo ta kome.
https://www.nierstichting.nl/nierschade-voorkomen/zout/
Uso di remedi
Ora tin kaso di un funshon di nir redusi, esaki por kousa ku sierto remedi ta akumula den e kurpa. E akumulashon aki por kousa oumento di e chens di efektonan sekundario di e remedi, ku por kousa na su turno daño mas grandi na e nir. Den hopi kaso e médiko ku ta trata e pashènt no tin idea ku e nir ta mustra siñal ku su funshon ta bai atrás. Esaki ta hasi e chens pa mas influensha negativo pa e nir aún mas grandi. Pa e motibu aki ta importante pa monitoria e proseso aki pa asina por adaptá e medikamentu (otro dosis i/òf otro remedi). Ta importante pa gruponan di riesgo someté nan mes regularmente na kontrol i análisis di sanger i/òf orina. E resultadonan mester wòrdu kompartí ku tur profeshonal den kuido involukrá
Malesa di nir i bo bida
Biba ku malesa di nir por tin hopi efekto riba bo bida. Komo pashènt di diálisis bo mester tene kuenta ku bo ta bezig ku diálisis 3 biaha pa siman alrededor di 4 ora pa dia. E punto aki tin impakto grandi riba bo bida diario. Pero e ta trese tambe insertidumbre over di bo salu, e efektonan pa bo famia i e heful ku bo no tin direkshon riba bo mes bida. Esaki nan por sòru pa un preshon èkstra riba bo i bo ambiente.
Pero bida ta sigui…
E pregunta ta: kon mi por sigui ku mi bida? Kon mi ta regla mi bida awor ku (kasi) diariamente mi ta pega na kas of na hospital na un nir artifisial? Ta hopi importante pa bo realisá bo mes ku bida di nir pashènt no ta imposibel. Ta importante pa keda optimista i wak kiko ta e posibilidatnan na lugá di konsentrá riba e kosnan ku no ta posibel mas. Tin hopi aspekto ku bo por hinka bida nobo den bo bida.
Papia ta yuda
No hasi bo malesa di nir un sekreto i/of un taboe, pasobra papia ku otro ta yuda den e proseso di dil ku e malesa. Involukrá bo famia, esnan rondó di bo i bo konosínan. Nan lo ta para kla pa tende bo i ofresé bo nan yudansa. Ku esaki lo bo mira posibilidatnan mas lihé pa sigui ku bo bida. Na final ta bai pa bo haña kontrol bek riba bo bida i pa bo haña dibertishon den bo bida.
Sòru pa distraishon den bo bida
Mas tantu distraishon bo tin ménos lo bo pensa riba e problemanan ku bo salu. Laborá ta di suma importansia den esaki. Traha ta un manera pa trese satisfakshon den bo bida. Sigui un estudio, kurso òf training tambe lo por trese mas brio den bo bida.
Aktividatnan di tempu liber atraves di deporte, wega i pasa tempu
Pasa tempu liber sensato tambe por sòru pa distraishon i espesialmente plaser. Komo pashènt di nir ta posibel pa bo hasi deporte normalmente. Sea ta bo deporte faborito promé ku bo a wòrdu konfrontá ku malesa di nir òf un deporte nobo ku ta pas mas mihó na bo estilo di bida nobo. Pero un hòbi nobo òf drenta un asosiashon nobo tambe por trese hopi energia.
Fakansi
Plania un fakansi den eksterior. Den e área aki tin hopi mas posibilidat ku bo por imaginá bo. Tene kuenta delantá ku e posibilidatnan pa dialisá i ku tin un bon hospital den e besindario ku bo ta bai keda pa den e kaso di un emergensia. Deliberá e posibilidat di un fakansi ku bo dòkter. Tene bo mes na e preskripshon médiko ku bo a palabra ku bo dòkter.
