Kiko Nierstichting Curaçao ta hasi
NSC ta ehersé diferente aktividat den kuadro di realisashon di su metanan. Esaki nan ta varia di duna sosten na pashènt di nir te ku organisá diferente aktividat riba tereno di prevenshon di malesa di nir.
Duna informashon
Un di e tareanan di mas importante di NSC ta pa duna informashon na públiko. Un punto di lansa di NSC ta pa suministrá públiko ku informashon tokante malesa di nir en general, e riesgonan i e manera ku malesa di nir por wòrdu prevení. E meta prinsipal den esaki ta pa krea konsientisashon tokante funshonamentu di nir, e funshon di nir den e kurpa humano i realisashon di kambio di komportamentu i estilo di bida di e públiko pa prevení malesa di nir. Pa e propósito aki informashon ta wòrdu duna tokante dieta (entre otro kome ménos salu, bebe mas awa), deporte i tur otro aspekto ku ta relevante.
NSC su enfoke ta riba henter pueblo di Kòrsou. Gruponan spesífiko ku NSC ta dirigí su mes riba dje ta muchanan (te ku 14 aña), hubentut (15 – 19 aña) i e gruponan den nos komunidat ku tin chèns elevá pa kontraé malesa di nir.
Den esaki NSC ta usa medionan tradishonal i esnan moderno pa informá públiko. Kobertura den medio (radio, televishon, korant) i material visual (folders, flyers, billboards, steker, magnet etc.) ta pertenesé na e formanan tradishonal di yega na públiko. NSC tambe ta usa mas i mas e medionan mas moderno manera wèpsait, Facebook i Instagram. Riba un plaso mas largu NSC tin e intenshon di pone e enfoke mas riba konserbashon nan "kara a kara", manera entrevista individual, den e stent di NSC òf diskushonnan den grupo.
Asistensia na pashènt
NSC ta brinda e posibilidat pa duna sosten material na pashentnan di nir den kasonan hopi spesífiko. E asistensia aki ta dirigí riba e pashèntnan ku tin un posishon suak den nos sosiedat. E petishon pa asistensia ta bini generalmente for di área di trabou manera di médikonan, enfermera, trahadó sosial òf for di e pashènt mes. Asistensia material nunka no ta wòrdu duna den forma di sèn efektivo.
Prevenshon
Ku su aktividatnan riba tereno di prevenshon, NSC ta purba desaroyá inisiativanan deliberá ku ta antisipá riba e faktornan di riesgo ku ta resultá na malesa di nir króniko. Ku esaki NSC ta alientá e komunidat pa aktua promé ku e problemanan ku nir surgi. Hèrmènt nan primario pa prevenshon ta suministrá informashon na komunidat di Kòrsou i organisá kampañanan spesífiko manera World Kidney Day.
Aktividatnan sosial/kultural ku “Amigunan di Nir”
Pashèntnan di nir a organisá nan mes den transkurso di añanan den “Amigunan di Nir”. NSC ta duna un aporte aktivo na e organisashon aki dor di organisá i finansiá diferente aktividatnan sosial/kultural. Asina tur aña enkuentronan sosial i un aktuashon teatral ta wòrdu organisá. E aña tradishonalmente ta wòrdu será den luna di desèmber ku un sena di Pasku.
Donashon
NSC tin e posibilidat pa organisashon nan haña sosten pa medio di un kontribushon finansiero (donashon). Áreanan di enfoke importante pa NSC ta por ehèmpel asosiashonnan di pashènt, instansianan den kuido manera sentro di diálisis etcetera i otro fundashonnan ku ta relatá na NSC.
E donashon por ta den forma di un kontribushon finansiero òf den natura. NSC ta mantené liñanan spesífiko i estrikto den e proseso pa husga petishonnan pa donashon. Den esaki NSC ta tene kuenta ku relevansia di e donashon, konkordansia ku e metanan di NSC i e altura di e suma ku ta wòrdu solisitá.
Rekoudashon di fondo
NSC no ta wòrdu subsidia dor di Gobièrnu ni niun otro instansia. Pa e motibu aki NSC mester finansiá su aktividatnan pa medio di su mes rekoudashon di fondo. E luna di mart tradishonalmente ta e luna di kolekta di NSC. E kolekta ta kai huntu ku e atenshon ku ta wòrdu duna na malesa di nir den kuadro di World Kidney Day.
Durante di e luna aki buzon nan di kolekta ta wòrdu partí na diferente lugá (pakus, tienda i organisashonnan) rònt Kòrsou. Tambe e boluntarionan di NSC ta kana rònt na diferente lokalidat (na toko i supermerkado) ku e buzonnan di kolekta di NSC. Tambe sa sosodé ku NSC ta risibí petishonnan pa pone buzon di kolekta insidentalmente na lugánan ku no ta lugánan públiko manera entiero, kongreso, symposium, beurs etcetera. Por entrega un petishon na NSC pa pone un buzon.
Apoyá investigashon sientífiko
Nierstichting ta promové un estilo di bida positivo di pashèntnan di nir pa asina nan por hiba un bida mas normal ku ta posibel. Pero, na promé lugá Nierstichting ta dirigí su mes riba prevenshon di malesa di nir. Pa e motibu aki NSC ta fasilitá investigashon sientífiko ku ta duna un mihó bista di e problemátiko di nir na Kòrsou. Asina por desaroyá maneho mas dirigí ku e meta pa drecha kalidat di bida di pashèntnan di nir i pa prevení malesa di nir. Riba e punto aki NSC ta un partner den deliberashon ku Gobièrnu di Kòrsou pa duna un aporte na formulashon di un maneho integral riba tereno di nir, malesa di nir i su prevenshon.
Edifisio di Diatel
NSC ta doño di e edifisio di Diatel na Jan Noorduynweg. E edifisio ta fungi komo Sentro di Dialisá di Sint Elizabeth Hospitaal pa pashentnan ku ta bini di besindario di Santa Maria, Mahuma, Juan Domingu, Stenen Koraal, Souax i henter e área di Bándabou.
