Historia

Nierstichting Curaçao (NSC) a wòrdu instituí na aña 1987. E meta di e fundashon ta pa hasi tur loke ta nesesario ku ta den interes di e pashènt di nir i su famia. Optimalisashon di posibilidat pa dialisá pa pashènt di nir na Kòrsou, tabata un di e metanan prinsipal ku NSC a boga p’e for di inisio di e fundashon. Duna sosten na pashènt di nir, traha riba prevenshon, duna un aporte na investigashon sientífiko i duna ayudo riba tereno sosial ta pertenesé na e metanan di NSC. E metanan aki a kondusí e tempu aya na planiamentu, desaroyo i realisashon di Diatel.

Pa e eksplotashon di e sentro di diálisis “Diatel” a lanta un fundashon separá na aña 1991. E institushon di Diatel (un konsolidashon di e palabranan dialyse i hotel) a bira un hecho na aña 1992. Diatel ta destiná pa pashèntnan di nir ku nan situashon ta "demasiado bon" pa bai hospital, pero ku pa diferente motibu, diálisis na kas ta keda un inkonvinensia muchu grandi.

Na promé lugá i prinsipalmente tabata e idea pa ofresé esnan ku a wòrdu kondena pa dependé di ekiponan médiko pa henter nan bida, kondishonnan agradabel ku no mester ta mas karu ku e posibilidatnan eksistente na hospital.

E kondishonnan agradabel ta inkluí un ubikashon sentral, un espasio amigabel ku yudansa profeshonal pa asina e pashènt por someté su mes na e tratamentu nesesario. E enfermeranan ta hasi e konekshon entre e pashènt i kas, algu ku ta  wòrdu eksperensiá komo hopi importante.
Na 1989 tabatin alrededor di 40 pashènt di diálisis na Kòrsou, kaminda tabatin solamente 8 aparato di diálisis disponibel. Hospital Sint Elizabeth (Sehos) tabata  e úniko instansia ku tabata ofresé posibilidat pa diálisis. Ku inisio di Diatel a bini inisialmente 6 stul di diálisis aserka.

Na aña 1996 e eksplotashon di Diatel ta wòrdu traspasá pa Sehos. Ku e hecho aki e enfoke NSC a wòrdu adaptá pa asina por pone muchu mas tantu énfasis riba suministro di informashon, prevenshon i dunamentu di sosten na pashèntnan di nir i nan famianan. Na e momentonan aki Diatel ta disponé di e kantidat total di 13 stul pa diálisis. Banda di esaki Sehos i Curaçao Dialysis Center (CDC) ta disponé respektivamente  di 18 i 20 stul pa dialisá. E kantidat total di pashènt ku ta dialisá na Kòrsou ta varia. Aktualmente tin alrededor di 300 pashènt di diálisis na Kòrsou.

Mishon, vishon i meta

E mishon di NSC ta pa kontribuí na un Kòrsou mas saludabel i pa desempeñá un papel importante na e mantenementu òf oumento di e kalidat di bida di pashèntnan di nir na Kòrsou.

E vishon di NSC ta pa ta konosí komo un fundashon prominente den e sosiedat di Kòrsou i ku ta aksesibel pa tur hende. NSC ta konta den esaki ku respaldo di timnan di profeshonal ku ta traha efikasmente i pa un programa di prevenshon ku ta funshoná bon durante henter aña.

E ophetivo prinsipal ta pa brinda apoyo na gruponan sosial den nos sosiedat ku tin mester di atenshon riba tereno di malesa di nir i diálisis di nir. E sosten aki ta wòrdu duna den e siguiente áreanan:

• Na pashèntnan durante tratamentu di malesa di nir hasiendo uso di nir artifisial òf transplante
• Na famianan di pashènt di nir
• Durante investigashon sientífiko den área di malesa di nir i
• Den kaso di prevenshon di malesa di nir.

Staf

E staf di NSC aktualmente ta konsistí di 4 miembro di direktiva ku ta ehersé e trabou aki riba un base boluntario. E miembronan di direktiva i nan funshonnan ta:

E miembronan di direktiva ta determiná e direkshon ku NSC ta hiba i ta implementá esaki ku gran entusiasmo. Nan ta konta ku apoyo di un empleado na ofisina di NSC ku ta traha  na ofisina parsialmente, ku ta mantené kontaktonan ku stakeholdernan i otro partidonan di interes i ku ta enkargá ku tareanan atministrativo. Konhuntamente nan ta hasi tur loke ta posibel pa  mantené e organisashon interno riba e kaminda  korekto i ahustá e direkshon di esaki ora ta nesesario.