Kiko abo por hasi
Hasi un donashon
NSC no ta wòrdu supsidiá dor di Gobièrnu òf otro instansia. Pa e motibu aki NSC ta finansiá su aktividatnan pa medio di fundrasing propio. Bo por kontribuí dor di hasi un donashon na NSC na diferente manera.
Tur tiki ta yuda : donashon den luna di kolekta (mart)
Tur aña atrobe NSC ta tene su luna di kolekta. Pa esaki e busnan di kolekta ta wòrdu pone na diferente sitio i/òf establesimentu rònt Kòrsou. NSC ta hasi kolekta interno den kompania nan tambe. Bo por kontribuí dor di hasi un donashon den un bus di kolekta. Den kaso ku bo mira un boluntario di NSC riba kaya, bo por aserka esaki pa hasi bo donashon.
Hasi un donashon un biaha òf mensualmente riba nos kuentanan bankario
Tambe ta eksistí e posibilidat pa hasi un donashon úniko dor di transferí un suma riba nos kuenta bankario. Bo por transferí mensualmente un suma chikitu tambe pa medio di un standing order. Nos kuentanan di banko ta: MCB – 70689800, RBC – 1310542, BdC – 13312501, Giro – 1110372 en Vidanova – 0011-512500-001.
Kolekta na okashonnan spesial
Ta posibel pa kolekta pa NSC na un okashon spesial manera entiero (di un pashènt di nir), aniversario òf hasimentu di aña. Nierstichting ta pone su buzonnan disponibel pa tipo di aktividatnan asina. Tuma kontakto ku Nierstichting Curaçao na telefòn 05999 736-1446, 05999 523-1446 òf manda un e-mail na: info@nierstichtingCuraçao.org.
Partisipá na un evento
NSC ta partisipá na diferente evento òf ta organisá eventonan nan mes durante henter aña manera charla, workshop i e “awareness walk” anualmente. Komo famia òf amigu di pashènt di nir òf komo interesado bo por partisipá na aktividatnan di NSC. Ku bo partisipashon bo ta sostené pashèntnan di nir, bo ta kontribuí na konsientisashon di malesa di nir i bo por pasa e informashon ku bo risibí na bo alrededor pa asina hasi mas hende konsiente di e malesa aki.
Tene e anunsionan na bista riba e wèpsait i riba medio sosial pa bo keda na altura di tur evento i aktividat.
Usa material
NSC ta purba na produsí i repartí mas tantu material posibel manera folders, flyer, artíkulo den korant òf revista. Tin biaha NSC ta hasi esaki independientemente i den otro kaso e ta hasiele den kooperashon ku su partnernan manera Nierstichting Nederland i Sokudi. Riba e wèpsait tin un paginá spesial kaminda bo por haña tur material i por download esaki nan grátis. Tambe tin un link ku ta dirigí bo na e wèpsait di Nierstichting Nederland pa asina bo haña aun mas tantu informashon.
Pasa i hasi un bishita …
NSC ta partisipá durante aña na diferente evento manera ferianan di salú. Nos ta invitá bo pa pasa na nos stènt pa un kòmbersashon, pa informá bo mes riba e último desaroyonan òf pa bo tuma material di NSC.
Duna bo opinion
NSC ta un fundashon den rekonstrukshon. Pa nos organisashon ku ta den e proseso di siña, bo opinion ta di gran balor. Bo por duna bo opinion dor di yena e formulario riba nos wèpsait. Tambe bo por usa e kanalnan di medio sosial: Facebook i Instagram. Bo ideanan pa aktividatnan nobo tambe ta bon bini. Nos lo hasi nos máksimo pa kontesta bo i reakshoná riba bo opinion.
“Un boka bisa otro”
E mihó manera pa plama un mensahe ta pa hasi uso di e prinsipio di “un boka bisa otro”. Nos ta invitá bo pa aserka NSC, pa informá bo mes riba nir i malesa di nir, e manera pa kontra-arestá esaki i pa plama e mensahe di NSC bou di famia, amigu i kolega. Tambe bo por hasi uso di tur material ku NSC i Nierstichting Nederland ta disponé di dje.
Registrá bo mes komo boluntario
NSC ta buskando boluntarionan entusiasmá ku kièr yuda den organisashon i ehekushon di aktividat òf den sosten di direktiva den diferente komishon òf tim. E aktividatnan ta konsentrá nan mes rondó di charla, kongreso, symposia i marshe di salú. Regularmente NSC ta wòrdu invitá pa pone stènt di informashon na aktividatnan. Tin nesesidat di boluntario den ponementu di stènt , pa risibí i informá públiko i ora di tene charla den sentronan di bario riba henter Kòrsou.
NSC ta ofrese trabou di boluntario varia den un esfera sumamente plasentero kaminda oportunidat ta wòrdu brinda pa desaroyá kalidatnan personal i di kompetensianan profeshonal. Tambe e ta brinda oportunidat pa pone kontaktonan balioso ku partisipante i otro boluntario.
Abo ta e persona entusiasmá ku tin e pashon pa komprometé bo mes pa salu di nir na Kòrsou, bo por skucha otro nan bon, bo tin abilidatnan komunikativo bon i bo por traha bon huntu ku otro boluntario? Manda nos un e-mail na This email address is being protected from spambots. You need JavaScript enabled to view it. i registrá bo mes. Nos ta tuma kontakto ku bo pa un entrevista orientativo.
